Bhoole se kabhi unki nawaazish nahiN hogee
Khuddaar haiN hum se bhee guzaarish nahiN hogee
Hum woh haiN jo har dard chupaa lete haiN dil meN
Hum se kabhi zaKhmoN ki numaaiish nahiN hogee
Is dil meN kisee aur ka gham tere alawah
Yeh jurm hai hum se tou yeh saazish nahiN hogee
Likhi hai ghazal apni tamanna ke lahoo se
Kya gham hai jo sheroN ki sataaiish nahiN hogee
Dou ghoonT moHabbat ki sharaaboN ke piye kya
Waaiz ne kaha aap ki baKhshish nahiN hogee
Is dil meN faqat Arzoo-e yaar basee hai
Ab hum se kisee aur ki Khuwaahish nahiN hogee